“मझगावाँ आगलागी : सामान्य दुर्घटना कि योजनाबद्ध षणयन्त्र ?”

मर्चवार ३०, साउन । कोटहीमाई–५ मझगावाँ, रुपन्देहीमा मंगलबार राती आगलागी भएको छ । घटनामा साढे चार लाख बराबरको धनमाल क्षति भएको छ । यो केवल संयोग थियो या योजनाबद्ध षणयन्त्रको प्रतिफल भन्ने गम्भीर प्रश्न उब्जाएको छ ।

टीनको टहहरामा नास्ता पसल सञ्चालन गर्दै आएकी सनिचरी यादवका अनुसार, आगो स्वतः लागेको होइन । उनले यो प्रकरणलाई प्रत्यक्ष योजनाबद्ध आगजनी बताउदै कोटहीमाई–५ का पूर्ववडाध्यक्ष हनुमान यादव बिरुद्ध उजुरी दिएकी छन । 

केही वर्षदेखि उनीबाट निरन्तर धाक–धम्की र मानसिक यातना सहँदै आएकी सनिचरीले बताइन । “मंगलबार राती करिब ९ बजे पसल बन्द गरी डेरा फर्किँदै गर्दा बाटोमा भेटेका आरोपीले जलाईदिन्छु भनेर धम्की दिए,” उनले भनिन, “केही मिनेटमै पसल जलिरहेको खबर पाएँ र म बेहोसझैँ भएँ ।”

इलाका प्रहरी कार्यालय मझगावाँका प्रहरी निरीक्षक सन्तोष बस्यालका अनुसार, घटनामा लत्ताकपडा, खाद्यान्न, फर्निचर, भाँडावर्तन, नगद र गहना समेत करिब ४ लाख ५० हजार रुपैयाँ बराबरको क्षति भएको अनुमान छ । “घटनाको खबर पाउनेबित्तिकै प्रहरी पुगेको थियो र आगो नियन्त्रणमा लिएको थियो । विभिन्न कोणबाट घटनाको अनुसन्धान भइरहेको छ,” प्रहरी निरिक्षक बस्यालले बताए ।

घटना आरोपी एवं पूर्ववडाध्यक्ष यादवले भने आफू निर्दोष रहेको दाबी गर्दै यो आरोपलाई ‘राजनीतिक र व्यक्तिगत प्रतिशोधको परिणाम’ भनेका छन । “मैले अरूको घर बनाइदिने मान्छे हुँ, कसैको घर जलाउँछु ? घटना भएको बेला म आफन्तीकहाँ निम्तो खाएर घर फर्केको थिएँ,” उनले भने ।

कोटहीमाई–५ का वडाध्यक्ष संजय कुमार सैनीले पनि घटनालाई संयोग मात्र भन्न कठिन भएको टिप्पणी गरे । “विद्युतीय सर्टसर्किट वा अन्य कारणबाट आगो लागेको भए, जस्तापाताको घरमा तत्काल चौतर्फी रुपमा आगोको ठूलो मुस्लो देखिँदैनथ्यो । ग्यास चुल्हो बन्द अवस्थामा थियो र आगोको कुनै चुल्हो पनि बालिएको थिएन,” उनले भने । सैनीका अनुसार, घटनाको सत्य पत्ता लगाउन स्वतन्त्र र निष्पक्ष छानबिन आवश्यक छ, ताकि दोषी उम्किन नपाओस् र निर्दोष फस्ने अवस्था नआओस् ।

स्थानीयवासीको आशंका, सामाजिक संजाल फेसबुकभरीको प्रश्न, पीडितको प्रत्यक्ष आरोप, आरोपीको इन्कार र वडाध्यक्षको संकास्पद टिप्पणीले यो प्रकरणलाई सामान्य आगलागी भन्दाबढी रहस्यमय बनाएको छ । अब प्रहरीको अनुसन्धानले मात्र त्यसमा सत्यको उकालो वा ओरालो देखाउनेछ ।